先唔好計香港，連日本關東地區都三十幾度，想殺死人咩。唔出街，最好坐喺屋企煲冷氣，上吓網，睇吓有咩得意嘢買嚟消暑。近期Amazon.jp湧現不少慳電又好玩嘅消暑小玩意。今次介紹5樣畀大家參考吓，同埋講吓買番香港用有乜要注意。

刨冰，係最classic又最work嘅消暑恩物。筆者認為，嘆杯淋滿糖漿嘅刨冰，感覺仲正過食五、六十蚊盒Häagen-Dazs。想喺香港嘆刨冰，其實可以自己親手做。呢部ふわふわ 氷かき器，全電動操作，啱晒懶人，外型夠retro，擺喺廳當擺設都幾得意。

產品網址
http://goo.gl/wuefYj

日本有不少貨品都是本土限定，不輸出海外，買之前要睇清楚。以日本Amazon為例，書、CD及黑膠唱片、Blu-ray同DVD都可售予海外買家。但手機、電子遊戲相關（遊戲或主機）、化妝品及玩具，多數列入國內限定。

喺公司屈咗成日，食到成肚死貓，有咩好得過放工整杯急凍啤酒，幫自己消消氣，打打氣。啤酒放雪櫃，始終做唔到酒吧嗰種冰凍效果；放冰格又怕冇記性，爆樽爆罐要抹餐死。不過，有咗呢部Takara Tomy 極冷啤酒機，過程就簡單好多，只需預先放冰、水同鹽喺冷凍器，之後再將350ml或500ml嘅啤酒放入機裏，5分鐘內就做到接近冰點嘅啤酒。機身仲分為「酒」同「啤酒泡」兩部分，認真盞鬼。細路仔未飲啤酒，扁晒咀？傻啦，呢部機雪汽水都得㗎。

產品網址
http://goo.gl/bm6yi8

有時你去睇件貨，有無發覺佢地好時都另一個價錢寫著税込，其實呢個代表已經包含5%消費稅。假如無的話，你就要自己先加返個稅先知實際價錢。

喺屋企開Party或成班人一齊睇波，梗要有大量啤酒汽水，大量冰粒自然唔少得。但冰格有限，而且雪櫃喺呢啲party time實會「滿座」，重新製雪又要幾個鐘，點好？唔駛起多啦A夢支招牌jingle都知有好介紹，不妨考慮呢部コンパクトアイスメーカー （中譯Compact Ice Maker）ZB-08製冰機，只需加滿水，就可每11分鐘製冰12粒，長著部機，一個鐘有成五打冰，用唔晒攞嚟整蠱朋友都得。

機身相當的骰，只有11.8x12.2x14.1吋（闊x高x長），唯一缺點係機身不設冷藏功能，所以，整好啲冰要盡快用，或放入冰格。

產品網址
http://goo.gl/FHNSss

大多數日本本土電器都採用110伏特電壓。要喺香港用，就需要加配變壓器，（俗稱火牛），揀變壓器要留意兩項要點：要買由220V轉110V，揀選支援你件電器的watt。例如一部電視要500watt，但你的變壓器只支援至450w，咁就會開唔到機，但買大watt數就無問題。

要買變壓器唔一定要學老豆話「去鴨寮街啦！」，事實上，Log-on呢類日系連鎖店都有，＄450左右已可買到質素不俗的1000watt變壓器。

你唔係同我講，夏天要減肥，一杯雪糕都唔會食！識得食，一定鍾意食意大利雪糕Gelato，貪佢口感滑，顏色夠sharp。但條街熱到人都就嚟溶，咁又點喺街食Gelato？

事先聲明，Taji出品的TGM-800呢部雪榚機唔係平嘢，佢亦唔會幫你做雪糕漿，但製冷到攪拌呢啲繁複步驟，佢幫你搞掂晒。價錢為85,536日圓，折合約6,459港元，連運費夠你買部Macbook Air，嫌貴？去麥記囉。

產品網址
http://goo.gl/OB77Ce

產品網址：
http://goo.gl/EFkKsN