【嘢唔可以亂食】雞泡魚究竟有幾毒？

POSTED ON 03 Jan 2017

元旦日就有位人兄因為食咗自製嘅河豚（雞泡魚）而中毒入廠，不過自小睇日本風情畫（或者唔係），都有印象河豚係超級毒物，絕對唔能夠輕易自己處理，尤其是依家網上咁多片睇，千祈唔好以為睇完片就可以自己劏。

河豚刺身自日本江戶時代已經流行，奉為人間美味，不過日本人對處理河豚料理嘅要求格外嚴格，料理師傅需經約五年測試考取牌照，才有資格處理河豚。（強國某省話四日就可以完成培訓同取得資格，諗起都心都寒埋。）

你可以睇下日本師傅點樣處理雞泡魚：


點解咁要咁嚴格處理？因為河豚河豚嘅內臟、肌肉、血液、皮膚等等唔同部位都有水溶性神經毒素，以肝最毒，毒素強度係氰化鈉嘅1000 倍以上（上年嘅天津大爆炸，正正就係氰化鈉…），每隻河豚嘅毒素足夠殺死30個人，進食後，可以喺四個鐘內奪人性命，真心好恐怖。

雖然毒性強，但河豚嘅美味依然吸引到好多人想同死神同枱食飯。唔止係日本，其實中國古代都有唔少歷史名人係河豚愛好者，好似北宋詩人蘇軾、歐陽修等等均愛好此道，不過我相信佢地今世投胎就唔敢食啦。

嘢真係唔可以亂食，尤其係有毒性嘅食材，要謹慎處理。