{ SKIP }
文:李羅渣  
POSTED ON 08 Jan 2017


做球迷嘅,心入面總有一兩個唔係特別好波,但係你總會特別留意嘅球員,對我黎講,阿倫史密夫就係呢一類。喺列斯出道時因為性格火爆令佢有「辣椒仔」嘅花名,不過歲月不饒人,唔經唔覺佢已經36歲。大家最記得或者係佢喺2006年足總盃代表曼聯上陣對利物浦時,被懷斯射斷腳重傷,令本來實力不俗嘅佢自此走下坡。現時佢就效力英乙球會諾士郡,但由於諾士郡自11月中得到11和9負嘅惡劣成績,球會炒咗領隊John Sheriden,阿倫史密夫就升格為球員兼看守領隊。



講起阿倫史密夫,一定有部份Gentlemen提起佢打曼聯時嘅零角度own goal,但更大部份人應該會記得呢位球員雖然周身刀無張利,不過鬥志同熱誠真係一等一,上得場一定搏盡。佢加盟曼聯時正值堅尼離隊防中位置求材若渴,費sir將原本打前鋒嘅佢改造成防中。不過呢個改造被視為毀滅阿倫史密夫足球生涯嘅另一主因,改造中場嘅佢防守技術唔見得好,連本身做前鋒嘅射手觸角都無晒。加上斷腳重傷令阿倫史密夫休息咗14個月先復出,雖然首場比賽係歐聯八強主場7-1大勝羅馬,佢仲有份入波,但呢個亦都係佢於曼聯嘅最後一個入球,之後就無以為繼。後來就轉會紐卡素,再到英甲嘅米爾頓凱恩斯。



狀態越嚟越差,踢嘅球會一間俾一間細,不過傷患並無令阿倫史密夫放棄足球,反而令佢成為一個更成熟嘅人。佢視傷患為運動員犧牲自己換取榮譽嘅證明,阿倫史密夫去到米爾頓凱恩斯唔止踢波,仲考教練牌,希望可以幫到年青球員。呢次意外成為看守領隊嘅阿倫史密夫雖然只會執教喺尋晚作客摩甘比嘅聯賽,不過對球隊仍然有要求,就係希望球隊有激情。睇咗唔少有關辣椒佬近期嘅訪問,雖然比以往成熟穩重得多,但對於足球同比賽仍然富有激情同鬥志。



身型肥咗、鬍鬚多咗、個頭變返啡色,不過阿倫史密夫仍然係佢自己,對比賽全情投入,亦不停地裝備自己,雖然執筆之時未知阿倫史密夫嘅領隊處子戰結果係點,不過正如佢本人所講,佢由一個年老球員變成一個年青領隊,都係一個足球生涯里程碑,如果有一日阿倫史密夫可以以領隊身份重返英超,都會受球迷歡迎。


李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青。






由台灣赤燭遊戲開發嘅恐怖遊戲《返校》,上星期五開始喺Steam上市,一出反應超熱烈,超過97%玩家留下好評,成為Steam榜首遊戲。如果你都鍾意玩恐怖遊戲,咁就要試下佢喇!https://youtu.be/V_QHngzFIy4遊戲以60年代 ...
hobby
恐怖遊戲fans必玩 台製《返校》熱爆Steam
19 Jan 2017
八隻元祖角色,你做鍾意又係邊隻?
hobby
Yoga Flame! 港產T.N.C. 印度佬登場!
18 Jan 2017