復活節假相信唔會影響各位睇波心情，更何況星期日晚有曼聯主場對車路士呢場話題之戰？對目前處於朽榜首嘅車仔嚟講，剩低賽程入面就只剩曼聯可以稱為「強隊」，過埋呢關英超冠軍真係坐定粒六。而曼聯就要爭歐聯資格，雖然而家歐霸盃比較順利，不過盃賽始終All or nothing，出局就乜都無，如果贏到波，就可以keep住以聯賽名次爭取歐聯資格嘅希望。甚至對摩連奴嚟講，喺聯賽首循環同足總盃都敗走史丹福橋，呢次喺奧脫福迎戰舊主梗係想爭返口氣。結果曼聯都得到重要3分，以2-0氣走車路士。不過要講到曼聯贏波邊個最開心，就一定係熱刺啦。

熱刺星期六晚贏般尼茅夫4-0之後刷新咗兩個紀錄，第一個就係球隊首次喺英超取得七連勝；第二就係前鋒哈利簡尼成為英超史上第四位連續三季都有超過20個入球嘅前鋒（前三位係舒利亞、亨利、雲尼斯達萊），所以贏呢場波對熱刺嚟講係一個里程碑。而爭標方面，車路士一度領先第二位成10分，大家都以為今年被譽為「超級領隊大戰」嘅英超會提早分出勝負。但車仔輸俾曼聯之後，唔覺唔覺原來只係領先熱刺4分，唔怪得星期日晚好多熱刺迷都變成曼迷啦。

老老實實，如果就剩餘賽程而言，車仔奪冠機會始終比較高，嚟緊六場聯賽只有愛華頓比較難應付。盧卡古仲要爭神射手，肯定遇神殺神，遇佛殺佛。至於其他比賽，唔係對手已經無嘢好爭就係榜尾分子，只要唔好好似之前主場發波瘟咁輸畀水晶宮，冠軍可謂手到拿來。而熱刺方面除咗要對死敵阿仙奴之外，仲有要搶分上前四嘅曼聯，前者有雲加就回應球迷變陣，轉打3-4-3打開勝利之門一洗頹風，熱刺又要重新估計；後者已經22場聯賽不敗，加上新勝車仔士氣大增，熱刺想袋穩三分唔易，要奪冠就更加要期望車仔失分，難度自然更高。

講返曼聯對車仔場波，雖然曼聯無出伊巴，不過仍然贏兩球，除咗要讚後防表現，更加多得靴里拉交出超水準，除咗完封夏薩特之外，全場兩個入球都同佢有直接關係，成為呢場match of the match係實至名歸。至於有人話佢1-0助攻拉舒福特前犯咗手球。其實有睇返慢鏡你會見到佢喺馬迪踢起個波前一直雙手垂低，而個波去到靴里拉身邊時佢大動作縮手，證明佢唔係主動或有意用手掂波，咁嘅情況下球證會吹嘅機會好微。睇波有喜好絕對冇問題，但如果連過往自己認識嘅球例都專登唔講，咁對提升自己欣賞足球嘅水平係完全無幫助。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。