{ SKIP }
文:MenClub Mean娜  圖:MenClub
POSTED ON 07 May 2016

話就話今次訪問係DJ SODA同PJ MEAN娜嘅世紀會面,但其實早喺MEAN娜未惡搞SODA嘅《HOTLINE BLING》remix MV之前,MEAN娜就已經喺上年嘅Take Flight International活動中見過SODA,仲有同佢影相添!不過事隔咁耐,加上突然多咗PJ MEAN娜呢個身分,再見SODA,又別有一番新感覺。


是次同DJ SODA做訪問嘅場所位於九龍The Ritz-Carlton118樓、有世界最高酒吧之稱嘅OZONE內,當日係啤酒品牌Heineken® 喜力獨家電子音樂盛會STARCLUB,Heineken就請來多位國際知名DJ,包括︰美國電子音樂組合Manufactured Superstars、韓國超人氣性感DJ Soda、北京型男DJ Ginjo,仲有日本性感撩人舞團Mojo Dancers,等大家可以一邊隊啤一邊聽住電子舞曲shake your body。





雖然STARCLUB電子舞曲派對星光熠熠,唔少Model名人都有出席,例如Christy、連詩雅都有份到場參與。


不過講到勢頭最勁,引發全場高潮嘅,非韓國樣靚身材正嘅DJ SODA莫屬,老老竇竇,當晚唔少傳媒都係衝著佢而來(起碼MenClub係囉),That's why佢一出場,就呼聲四起,人氣仲勁過明星!



話明係電子音樂盛會,又點會齋請DJ SODA過嚟得個擺字呢?作為壓軸嘅SODA最後出場,本來頗為空曠嘅DJ台附近,立時堆滿晒人,個個都舉起手機拍低SODA嘅精彩表演。雖然大家對佢嘅打碟功力眾說紛揉,但係單單睇佢甜美嘅樣子、火辣嘅身材,就已經夠晒吸精……sor,係吸睛。唔公平?係架!正如人帥真好嘅道理,靚女梗係多著數~不過DJ SODA都唔係得個樣,縱然MEAN娜唔熟悉打碟技巧,唔方便作評論,但眼見SODA專心打碟之餘,不忘舞動全身帶動氣氛,就知佢有幾賣力去令大家更加hyper。








欣賞完DJ SODA 打碟嘅靚相,不如去片感受下現場氣氛同埋聽下SODA有咩同你講?

上年嘅MAMA after party同Take Flight International,今次係DJ SODA第二次嚟香港,由於SODA太忙,行程太緊湊,即使MenClub有幸同佢做訪問,都好難做到深度談,今次就先嚟個閒話家常,傾下佢嘅近況同對香港有咩感覺,將來有機會先再傾deep啲啦~


DJ SODA只係第二次嚟香港,但對香港嘅印象已經非常好,係衰在唔知點同一眾香港粉絲溝通,所以緊張到騰騰震!雖然大家語言不通,不過佢仍然非常感激大家等待佢,同埋收聽佢嘅歌曲,SODA仲好滾動咁話︰「原來認識我嘅人比我想象中更加多,我覺得非常幸福都非常驚訝!希望大家以後都可以多多期待同埋支持我!


而今次SODA嚟香港就係為咗參加STARCLUB電子舞曲派對,咪睇SODA表演時氣定神閒鬼咁淡定,訪問時佢就透露,其實對是次Party感到非常緊張!不過緊張還緊張,難得嚟到香港,當然都要放鬆下心情,SODA就plan好party完咗之後,要去行香港夜市,食好多好西。問到佢有咩特別想食,SODA就係咁講︰「CookieCookieCookieCookieCookieCookieCookieCookieCookieCookie~……香港咁多款Cookie,你想食藍罐嗰款定係識唱歌嗰款Cookie先?SODA就繼續講︰「聽講香港有一個非常出名嘅曲奇,所以想食下嗰隻曲奇。」追問之下,先知原來佢指Jenny Bakery!各位香港嘅SODA fans識做啦~?

Between,難得見到DJ SODA本尊,Mean娜決定吸一口氣,谷行個胸,勇敢踏上前問SODA一條極羞恥嘅問題︰「Er……其實我之前惡搞過你《HOTLINE BLING》個 remix MV,你有冇睇呀?你覺得點呀?>///<」SODA即刻笑住咁話︰「Mean娜比我更可愛,sexy,(Mean娜︰多謝)好搞笑!佢可以做到咁可愛sexy搞笑,仲扮得咁似(Mean娜︰你真係咁諗?!),我真係覺得佢好犀利!我亦非常感謝佢模仿我,其實連我公司所長都有偷偷地睇~」嗯,正所謂心美人就美,SODA咁貼心咁維護PJ MEAN娜嘅玻璃心,真係搞到人眼濕濕,我頓時覺得SODA背後有道天使光環……咦?原來係打燈XD?

咁完成HOTLINE BLING》remix MV之後,嚟緊仲有咩新作品畀PJ MEAN娜模仿先~?「Hotline Bling之後仲做左其他remix,取材自電影star war嘅歌,遲下將會拍攝充滿視覺效果嘅Video,到時記得留意喇~!」非常好!Mean娜會緊密留意,老細你就唔好睇喇~你唔睇我就可以唔使扮丫嘛~XP 

最後最後,為香港嘅SODA粉絲謀福利,問啲貼身啲嘅話題先~唔係問三圍呀衰鬼!係幫你哋問SODA鍾意點嘅男士呀!話說韓劇《太陽的後裔》喺香港勁紅,男主角宋仲基俘虜萬千少女心,老老竇竇,你又有冇追開先?鍾唔鍾意宋仲基呢類男仔先?SODA無奈咁話︰「我忙到連一分鐘嘅空閒時間都冇,所以未有機會睇,我啲朋友成日都講起套劇,講到我都好好奇,可惜真係冇時間。」但轉個頭講Dream boy時,就即刻流露少女甜笑︰「我嘅理想對象係好似爸爸類型嘅男仔,好friendly、 又可以被我倚傍住嘅男生<3」在場港男紛紛小學雞咁爭住講︰「我係我係我係!」係咩啫係!係就講韓文啦!!!

雖則一眾男粉絲包括MEAN娜(誤?)都希望有機會見多啲SODA,但係SODA實在太忙,成日都要周圍飛,根本冇時間喺同一個地方逗留太耐,佢話如果有時間有機會,都想試吓喺香港居住。唔緊要架SODA!有心唔怕遲~我哋會等你架!下次再見啦~拜拜(T_T)/~





後記︰上年第一次見SODA,由於時間所限,未有機會同佢講話,對SODA嘅印象,只流於表面,咪就係一個靚女性感嘅DJ。到第二次見SODA,終於有機會好好同佢做訪問,由佢準備表演到打碟,再返入後台休息,MEAN娜幾乎跟到實一實,見佢無時無刻不進入認真狀態,對自己嘅演出同大家嘅評價都非常著緊,就睇得出人們口中嘅「花瓶」,其實一直有默默努力,只不過係「寶寶心裡苦,但寶寶不說~」

事實上,好多人對DJ SODA嘅打碟技巧存疑,SODA心裡非常清楚,所以佢更希望靠實力去證明自己嘅能力,減少用樣貌身材去吸引大家注意。但其實MEAN娜同文青去到台灣夜店時,見台上DJ都係好似SODA咁,靚靚女女邊打碟邊跳舞,當下非常感慨︰「大家做嘅嘢差唔多,點解淨係要話SODA?」只能夠說,人紅是非多,當你有出色嘅外貌時,好多時就會被忽略自身才能,令人誤會乜都「靠個樣」。講真,MEAN娜唔識打碟,對於SODA嘅打碟技巧畀唔到任何評價,但問返好多狂插SODA嘅人,原來佢哋一樣唔識打碟,咁,請問插人嘅Point喺邊呢?SODA未必做得好好,但努力必然會有成果,假如你今天認為SODA並不完美,請等待佢成長,認真的人他日總會散發光彩。加油呀!DJ SODA!


//「…二來就是朋友關係,好像做些什麼都討好不了他們似的,但同時你明明沒做什麼,為什麼他們又會做這樣多來討厭你呢…其實當你不喜歡一個人的時候,他走步路都是錯的,我之後就十分明白這個心態。」// ... ... ... ...
menclubgirl
不停戰鬥的人生 - Larine Tang 鄧月平
14 Mar 2017
因為知道大家很愛(我們承認我們也是)Serene,但我們對她的認識實在也不多。所以我們就專誠邀請她來港,做全港第一個專訪,希望讓大家知道她究竟是一個有多可愛的小女生。 ... ... ... ... ... ...
menclubgirl
初次見面 – Serene Lim林宣妤
02 Mar 2017